Paglayag

Tayo’y maglalayag sa tamang oras at panahon,

Kapag wala nang pag-aalinlangan at handa nang sumuong,

Kapag hindi na mahalaga ang bawat “paano kung”

Tayo’y maglalayag;

Kapag ‘di na kayang makuntento sa pagtanaw mula sa malayo,

Kapag handa na sa mga alon ang mahinang puso,

Sa tamang oras at panahon, maglalayag tayo

(2017)

Narinig Mo?

Narinig mo?

Tawa kong kaparang ng loko loko

Kapag sa tabi ko, ika’y naririto

Narinig mo?

Pagtipa sa gitara’t pag-awit ng kanta

Na ilang araw ring kinabisa

Narinig mo?

Umuulan ng kulog sa dibdib ko

Sa tiyan ay lumilipad ang maraming paruparo

Ano, narinig mo?

—– —, Sabi ko

‘Di bale na

‘Di bale nang walang tugma

O kaya’y malalalim na salita

Itong mga tulang aking iaakda;

‘Di bale nang may kalakip na luha

At makupas ang mga pahina

Nitong mga sulat na ‘di naipadala;

‘Di bale na, ‘di naman mahalaga

Kung may tugon o wala,

‘Di bale nang umibig ng nag-iisa;

‘Di bale na

Lumingon Sana

Lumingon ka sana upang aking makita,
Matamis na kurba d‘yan sa mukha mong maganda;
Lumingon ka upang aking makita,

Naniningkit mong mga mata sa gitna ng iyong pagtawa;

Lumingon sana, nandito ako:

Sa labi’y nakaukit rin ang tuwa

Habang nakatunghay, ika’y mahika

Hintayan

Bakit ba tayo nagtataguan? 

Bakit pa naghahanapan? 

Kung hintayan na lamang sana

Ang larong ating natipuhan, 

Di na sana hiningal ng maraming habulan

Baka sakaling di na naligaw, 

Agad nasumpungan ikaw na aking hantungan